Nu possidente benestante de Casalviere, remettènne a poste ‘na proprietà ‘n campagna, scuprive ‘n meze agli campe quatte muraglie cu ‘na croce ‘n coppa.

‘Na vota dueva èsse stata ‘na chiesola, ‘na specie de tabbernacule ca cachedune digli vecchie pruprietarie, forze nu stesse antenate seie, avea fatte costruì pe vote o grazzia ricevuta.

Accortesene, gliu padrone dicidive de accunciàreglie.

‘Ncaricave pirciò muratore i ‘mbianchine de remette ‘n seste mura i parete.

Dàtese, po’, ca se ‘ntravedeva pure, verze gliu funne, ‘na traccia de culore, anze, de figure culurate, dicidive pure de fàrece refà ‘na pittura fresca ‘ncoppa.

Chesse pecchè la gente ca passava, abituata pe tradizione a farese la croce da luntane, almene ‘stu segne ca gli putesse fa verze cachedune o ca cosa ca fusse rapprsentate ‘lloche dente.

Nu pittore capace de fa ‘na cosa fatta bene stea a Roccasecca – a Crapule, pe l’esattezza. Accussì isse, gliu padrone de Casalviere, gliele fece sapè. Doppe poche se ‘ncutrarene i s’accurdarene de fa nu beglie quadrette drète gl’altarine, ca rappresentasse San Giuseppe, la Madonna i gliu Bambine.

Stabbilirene pure ca gliu ritratte gl’avriene chiamate la NATIVITA’. Pirciò ca se regulasse gliu pittore pe tutte chelle ca putea servì p’ arrivà agliu resultate.

Dope nu para de mise, tra preparazione i lavare, tutte fu pronte.

Gliu quadre era beglie ‘rosse i culurate (nu poche càreche, ‘n verità, cu sfumature pesantocce i ca prospettiva ‘n libertà … fa niente). Ce stea p’rò nu ciele stellate i la cometa ca te parea desse cadé ‘n fronte a chi la guardava, ma ca se fermava ‘n coppa alla stagliuccia addò stèvene Padre, Madre i Figlie vicine alla mangiatora. Cu ‘n aseneglie i ‘na vaccarella ca te sembravene propia vive. Facea tutte ‘mpressione pe quant’era cummuvente. Propia comm’a chelle ch’avea vulute gliu padrone.

Chelle però ca dea agl’occhie era gliu Bambineglie, ben misse ‘n carne i ossa ca parea nu vagliunceglie cchiù ca ‘na creatura appena nata.

Nu jorne gliu pittore, a ‘n amiche ca stea ‘n visita agliu tabbernacule, dumandava comme gli paresse la pittura. I chiglie respunnive ca era ben fatta, specie San Giuseppe, cu ’na barba longa ca te pareva vera, i la Madonna, cu ‘na mantellina azzurra addò pareva ca s’arrespecchiasse gliu firmamènte. Sule gliu Bambine gli pareva cresciuteglie, nu poche russiceglie p’esse nate da poche.

Al che gliu pittore, fattese penzieruse i cunvìntese ca la critica era fondata, print’ i sicure accusì responne:

_ Sì, è vere, gliu Bambineglie è ben misse, beglie ‘n carne. Ma chisse – (i nen se sa se ‘ulesse ‘ntènne gliu padrone digliu tabernacule o San Giuseppe i Maria) – chisse stau bbone, màgnene assaie, pirciò fau gli figli ‘rosse!